ແມ່ຍິງລາວ ຍັງຂາດ ຄວາມສເມີພາບ ກັບຜູ້ຊາຍ

ຈຳປາທອງ
2022.03.07
Share on WhatsApp
Share on WhatsApp
ແມ່ຍິງລາວ ຍັງຂາດ ຄວາມສເມີພາບ ກັບຜູ້ຊາຍ ໂຕຢ່າງ ແມ່ຍິງລາວ ທີ່ຕ້ອງເບິ່ງແຍງຄອບຄົວແມ່ນແຕ່ໃນເວລາ ຖືກພັຍທັມມະຊາດຄຸກຄາມ ກໍ່ຕາມ.
RFA

ມາເຖິງປັດຈຸບັນ ແມ່ຍິງລາວກໍຍັງໄດ້ຮັບຄວາມທໍລະມານ ຈາກຄວາມບໍ່ສເມີພາບກັບຜູ້ຊາຍ, ຈາກການປະເຊີນກັບຄວາມຮຸນແຮງ ແລະການຄ້າມະນຸດ ເຖິງແມ່ນທາງການລາວເວົ້າວ່າ ຈະພະຍາຍາມຫລຸດຜ່ອນ ແລະລົບລ້າງບັນຫາທີ່ວ່ານີ້ກໍຕາມ.

ໃນການຕ້ອນຮັບ ແລະສລອງວັນແມ່ຍິງສາກົນ ວັນທີ 8 ມິນາ ຄົບຮອບ 112 ປີ ໃນປີ2022 ນີ້ ກໍມີຄໍາຂວັນເພື່ອ “ຄວາມສເມີພາບຍິງ-ຊາຍໃນມື້ນີ້ ແລະຄວາມຍືນຍົງໃນອະ ນາຄົດ” ໃນຂະນະທີ່ໂຄວິດ-19 ຍັງຣະບາດຢູ່ ສະຫະພັນແມ່ຍິງລາວທົ່ວປະເທດ ໄດ້ຈັດກິຈກໍາຕ່າງໆ ເຊັ່ນການປະຖະກະຖາ, ມອບໃບຍ້ອງຍໍໃຫ້ແມ່ຍິງ ທີ່ທາງການຈັດຕັ້ງເຫັນວ່າມີຜົລງານດີເດັ່ນ, ການເກັບຂີ້ເຫຍື້ອເປັນຕົ້ນ.

ເມື່ອປີກາຍ ແລະຊຸມປີທີ່ຜ່ານມາ ຫລາຍພາກສ່ວນ ໄດ້ພະຍາຍາມແກ້ໄຂບັນຫາ ອັນບໍ່ດີຕ່າງໆ ໃນສັງຄົມ ທີ່ແມ່ຍິງລາວປະເຊີນ ເພື່ອຄວາມສເມີພາບລະຫວ່າງ ຍິງ-ຊາຍ, ເຮັດໃຫ້ແມ່ຍິງຫລຸດພົ້ນ ອອກຈາກຄວາມຮຸນແຮງ ແລະບໍ່ຕົກເປັນເຫຍື່ອ ຂອງການຄ້າມະນຸດ.

ຢູ່ເມືອງນາໝໍ້ ແຂວງອຸດົມໄຊ ລະຫວ່າງປີ 2020-2021 ແມ່ຍິງລາວ ອາຍຸ 18-19 ປີ ຫລາຍຄົນ ໄດ້ຕົກເປັນເຫຍື່ອ ຂອງການຄ້າມະນຸດຢູ່ປະເທດຈີນ ຮວມທັງຖືກຕົວະຍົວະ ໃຫ້ແຕ່ງດອງກັບຜູ້ຊາຍຈີນ ຫລັງຈາກນັ້ນກໍຖືກຂາຍໃຫ້ຊາຍຈີນຕໍ່ ແລະປະເຊີນກັບຄວາມຮຸນແຮງຕ່າງໆນາໆ ຊຶ່ງໃນນັ້ນບາງຕົນໄດ້ຮັບການຊ່ອຍເຫລືອຈາກເຈົ້າໜ້າທີ່ ໃຫ້ໄດ້ກັບຄືນບ້ານ.

ແມ່ຍິງລາວ ທີ່ປະເຊີນກັບບັນຫາອັນບໍ່ດີຄືແນວນັ້ນ ຕົ້ນຕໍກໍຍ້ອນຄວາມທຸກຍາກລໍາບາກ, ບໍ່ໄດ້ຮຽນໜັງສືຫຍັງຫລາຍ, ຮຽນຈົບຊັ້ນປະຖົມກໍຍັງວ່າດີ, ອອກໂຮງຮຽນໄປຊ່ອຍວຽກງານພໍ່ແມ່ເຮັດນາ ເຮັດໄຮ່ດ້ວຍຄວາມລໍາບາກ. ເມື່ອມີຄົນຕ່າງຖິ່ນ ຫລືຕ່າງປະເທດມາຍົວະເອົາເງິນເປັນສິ່ງຈູງໃຈ ວ່າຈະມີເງິນ, ໄດ້ຢູ່ ໄດ້ກິນດີ ກໍເຮັດໃຫ້ແມ່ຍິງລາວຫລົງເຊື່ອ ແລ້ວກໍຕົກເປັນເຫຍື່ອຂອງພວກເຂົາໄປ.

ດັ່ງເຈົ້າໜ້າທີ່ ສະຫະພັນແມ່ຍິງ ເມືອງນາໝໍ້ ແຂວງອຸດົມໄຊ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 7 ມິນານີ້ວ່າ:

ຖຶວ່າແມ່ຍິງເຮົາ ທາງ ເພິ່ນກໍເອົາລັດເອົາປຽບເຮົາຫັ້ນແຫລະ ຍ້ອນບໍ່ຮູ້ເນາະ ຕົກເປັນເຫຍື່ອຂອງຜູ້ທີ່ແນວຄິດບໍ່ດີ ຫັ້ນແຫລະເອົາໄປຄ້າໄປຂາຍ ຮູ້ເທົ່າບໍ່ເຖິງການ ຖານະຄອບຄົວພໍ່ແມ່ທຸກຍາກ ຊວນໄປເຂົາເຈົ້າກໍຢາກໄປ ບໍ່ຄິດຄໍານຶງເຖິງຜົລກະທົບທີ່ຕາມມາຫັ້ນ.

ນາງກ່າວຕໍ່ໄປວ່າ ໃນໄລຍະຜ່ານມາ ສະຫະພັນແມ່ຍິງແລະພາກສ່ວນທີ່ກ່ຽວຂ້ອງຕ່າງໆ ກໍໄດ້ລົງໂຄສະນາກ່ຽວກັບ ຄວາມສເມີພາບລະຫວ່າງ ຍິງ-ຊາຍ ແຕ່ກໍບໍ່ທົ່ວເຖິງຍ້ອນງົບປະ ມານມີບໍ່ພຽງພໍ. ບ້ານໃດທີ່ໄດ້ມີການໂຄສະນາ ຮວມທັງຢູ່ຊົນເຜົ່າກໍພົບວ່າ ພຶດຕິກັມເປັນໃຫຍ່ຂອງຜູ້ຊາຍ ຫລຸດຜ່ອນລົງແດ່. ແລະການສະກັດກັ້ນການຄ້າມະນຸດ ເຈົ້າໜ້າທີ່ທີ່ກ່ຽວ ຂ້ອງຂອງລາວ ແລະຈີນ ກໍມີການປະສານງານຫາກັນຫລາຍຂຶ້ນ, ຫາກພົບກໍຣະນີສົງສັຍ ທີ່ອາຈມີຄວາມສ່ຽງ ທີ່ຈະຕົກເປັນເຫຍື່ອ ຂອງການຄ້າມະນຸດ ຢູ່ຊາຍແດນລາວ-ຈີນ ທັງສອງຝ່າຍກໍພະຍາມກວດກາ ໃຫ້ຄວາມຊ່ອຍເຫລືອ ແລະທັງ 2 ປະເທດກໍຫລີງເຫັນວ່າ ທາງຣົຖໄຟ ລາວ-ຈີນ ອາດເຮັດໃຫ້ແມ່ຍິງລາວ ມີຄວາມສ່ຽງທີ່ຈະຕົກເປັນເຫຍື່ອ ຂອງການຄ້າມະນຸດຫລາຍຂຶ້ນ.

ດັ່ງທີ່ນາງກ່າວວ່າ:

ເພິ່ນກໍປະສານງານຕັ້ງແຕ່ເພິ່ນໄດ້ມີ ໂຄງການທາງຣົຖໄຟເນາະ ມັນມີບັນຫາວ່າ ໂອ໋ ແມ່ຍິງລາວເຮົານີ້ ຕົກເປັນເຫຍຶ່ອການຄ້າມະນຸດ ຂອງຕ່າງປະເທດທີ່ມາທໍາງານຢູ່ລາວເຮົານີ້ ເຮົານີ້ພົບເຫັນ ບາດນີ້ເຂົາເຈົ້າກໍກວດກາ ກໍຮັດກຸມກວດແທ້ກວດວ່າ ເຂົາເຈົ້າກໍບໍ່ຮອດເຂົ້າໄປໄດ້.

ແລະວ່າ ຫາກສູນກາງມີງົບປະມານ ໃຫ້ພາກສ່ວນທີ່ກ່ຽວຂ້ອງລົງໂຄສະນາ ໃຫ້ຄວາມຮູ້, ຮິບໂຮມຂໍ້ມູນຕາມບ້ານ ກໍຈະສາມາດຊ່ອຍຫລຸດຜ່ອນ ເຣື່ອງແມ່ຍິງທີ່ຈະຖືກຕົວະໄປ ແລະເຮັດໃຫ້ຜູ້ທີ່ຖືກຕົວະໄປແລ້ວນັ້ນໄດ້ກັບບ້ານເກີດຫລາຍຂຶ້ນ ຊຶ່ງຈະເປັນການຊ່ອຍສະກັດກັ້ນ ຫລືຫລຸດຜ່ອນຈໍານວນແມ່ຍິງລາວ ທີ່ຕົກເປັນເຫຍື່ອຂອງການຄ້າມະນຸດ, ຄວາມຮຸນແຮງ ແລະຄວາມບໍ່ສເມີພາບ ຍິງ-ຊາຍ ນັ້ນໄດ້.

ເຈົ້າໜ້າທີ່ອົງການສະຫະປະຊາຊາດ UNFPA ກ່າວຕໍ່ວິທຍຸເອເຊັຽເສຣີ ເຖິງວັນແມ່ຍິງສາກົລ ທີ 8 ມິນາ ນີ້ວ່າ ທາງອົງການ UNFPA 22 ກໍໄດ້ເຊີນຊວນໃຫ້ທຸກຄົນ ເຂົ້າຮ່ວມໃນການຮຽກຮ້ອງ ຜ່ານທາງສື່ສັງຄົມອອນລາຍ ໃຫ້ຄວາມຮູ້ ແລະປົກປ້ອງແມ່ຍິງຈາກບັນ ຫາ ຫລືເຫດຮ້າຍຕ່າງໆ ຮວມທັງເພື່ອຍົກລະດັບແມ່ຍິງລາວໃຫ້ ເທົ່າທຽມກັບຜູ້ຊາຍ ຊຶ່ງປັດ ຈຸບັນ ຍັງພົບວ່າ ແມ່ຍິງລາວຍັງຖືກສັງຄົມ ຖືຕໍ່າກວ່າຜູ້ຊາຍຢູ່.

ເພນ ໂຕນີ້ ເຮົາຈະປົກປ້ອງຢູ່ໃນມຸມມອງທີ່ວ່າ ເວລາເຮົາໂພສຮູບເຮົາລົງເຟສບຸກ ແລ້ວຄົນອື່ນຫັ້ນນ່າໄປເຫັນ ແລ້ວໄປຕັດຮູບໜ້າເຮົາ ໄປໃສ່ອາດເປັນຮູບໂປ້ ອັນນີ້ກໍຖືວ່າແມ່ນສິດຂອງເຮົາ ທີ່ຈະໂພສຮູບເຮົາລົງ ແຕ່ວ່າບໍ່ແມ່ນສິດຂອງຄົນອື່ນ ໂດຍທີ່ວ່າບໍ່ໄດ້ຮັບອະນຸຍາດ ມາຕັດເອົາຮູບເຮົາໄປໃສ່ອັນອື່ນນີ້ນ່າ ຄືກັນກັບແຕ່ງເພັງ ໝູ່ມາຊື້ເພັງ ເຈົ້າກໍຕ້ອງໄດ້ຮັບເງິນຕອບແທນ ເພາະວ່າອັນນີ້ ແມ່ນເພັງທີ່ເຈົ້າແຕ່ງ ບໍ່ແມ່ນຜູ້ໃດເອົາໄປເຮັດຫຍັງກໍໄດ້.

ແມ່ຍິງເມືອງຊຽງເງິນ ແຂວງໄຊຍະບູຣີນາງນຶ່ງ ເວົ້າວ່າ ເວົ້າທົ່ວໄປແລ້ວ ແມ່ຍິງລາວຍັງຖືກເອົາປຽບ ຈາກການກົດຂີ່ແຮງງານ ໃນຫລາຍໜ້າວຽກ ແລະຫລາຍກໍຣະນີ ຕາມໂຮງຈັກໂຮງານຕ່າງໆ ໃນລາວ, ບາງໂຮງງານ ແມ່ຍິງຈະຖືກຈ້າງຕໍ່າກວ່າຜູ້ຊາຍ.

ກໍວ່າດ້ວຍຄວາມພໍໃຈເນາະ ບາງເທື່ອເຂົາຫວ່າງວຽກ ລະກໍບໍ່ມີວຽກເຮັດງານທໍາ ໄປເຮັດເປັນເດືອນ 2 ເດືອນແລ້ວກໍເຂົາ ຈັ່ງຊີ້ນ່າ ໄດ້ເທົ່າໃດເຂົາກໍເຮັດໄປ ຜູ້ຫວ່າງວຽກ ໂອ໋ ເບິ່ງວ່າສົງສັຍຈະໄດ້ຫລາຍ ຕໍ່າຫູກກໍປະຕໍ່າຫູກ ໄລຍະໃດໄລຍະນຶ່ງກໍຄືນມາ.         

ໃນຂະນະດຽວກັນ ເຈົ້າໜ້າທີ່ພາກປະຊາສັງຄົມ ທີ່ເຮັດວຽກກ່ຽວກັບເຊື້ອ HIV/AIDS ໃນລາວ ກໍກ່າວຕໍ່ວິທຍຸເອເຊັຽເສຣີໃນມື້ວັນທີ 7 ມິນານີ້ ເຖິງສຸຂພາບຂອງແມ່ຍິງລາວ ທີ່ມີຄວາມສ່ຽງຕໍ່ການຕິດເຊື້ອ HIV/AIDS ວ່າ ຖ້າຜົວຕິດເຊື້ອມາ ນາງຜູ້ເປັນເມັຍກໍຈະຕິດ ເຊື້ອນັ້ນ ແລະກໍເປັນບັນຫາ ສຳລັບແມ່ຍິງ.

ແຕ່ວ່າ ຖ້າວ່າຫາກແມ່ຍິງທີ່ວ່າ ຕິດເຊື້ອ ຖືພາ ເຮົາກໍຕ້ອງໄດ່ກິນຢາເນາະ ກິນຢາຕ້ານໄວຣັສ ມັນຈະຊ່ວຍປ້ອງກັນໄດ້ ກໍຄືວ່າແຫລະ ເຮົາຕ້ອງໄດ້ປິ່ນປົວ ໄດ້ໃກ້ຊິດດູແລ ປະຕິບັດຕາມຄໍາແນະນໍາຂອງແພດ.

ແລະວ່າ ດັ່ງນັ້ນ ໃນວັນແມ່ຍິງສາກົລ ທີ 8 ມິນາຂອງແຕ່ລະປີ ຫລາຍພາກສ່ວນກໍມີການລະດົມໂຄສະນາໃຫ້ຄວາມຮູ້ ຄວາມເຂົ້າໃຈແກ່ແມ່ຍິງ ແລະສັງຄົມໃນການແກ້ໄຂບັນຫາດັ່ງກ່າວ ຜ່ານສື່ສັງຄົມອອນລາຍ, ຜ່ານການຮຽນການສອນ ແລະການໂຄສະນາຕ່າງໆ ເພື່ອໃຫ້ຄົນໃນສັງຄົມຮັບຮູ້, ປັບປ່ຽນທັສນະຄະຕິ ໃຫ້ຄວາມສເມີພາບແກ່ແມ່ຍິງຫລາຍຂື້ນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ