ຫຼາຍແຂວງ ຍັງປະເຊີນກັບຄູສອນ ບໍ່ພຽງພໍ

ເນື່ອງໃນໂອກາດວັນຄູແຫ່ງຊາດ ປະຈໍາປີ 2024  ຄົບຮອບ 30 ປີ ທ່ານ ສອນໄຊ ສີພັນດອນ ນາຍົກລັດຖະມົນຕີ ເໜັ້ນໃຫ້ຜູ້ບໍລິຫານການສຶກສາເອົາໃຈໃສ່ ພັດທະນາຊັບພະຍາກອນມະນຸດແລະແມ່ພີມທີ່ດີຂອງຊາດເພື່ອຮັບປະກັນວ່ານັກຮຽນທີ່ຮຽນອ່ອນ, ຮຽນບໍ່ທັນໝູ່ຈະໄດ້ຮັບການບໍາລຸງຄືນ. ຂະນະທີ່ປັດຈຸບັນຫຼາຍແຂວງຍັງປະເຊີນບັນຫາຄູເຫຼືອບໍ່ພໍຈົນເຮັດໃຫ້ນັກຮຽນຮຽນອ່ອນ, ຮຽນບໍ່ທັນໝູ່ບໍ່ສາມາດສົ່ງນັກຮຽນສອບເສັງແຂ່ງຂັນນັກຮຽນເກັ່ງໄດ້.

ສະເພາະບັນຫາຄູເຫຼືອບໍ່ພໍຢູແຂວງອຸດົມໄຊກໍ່ຄືນັກຮຽນຊັ້ນ ມ.1 ມີທັງໝົດ 40 ຄົນ ມີວິຊາຮຽນ 9 ວິຊາ, ແຕ່ສະພາບຕົວຈິງຄູສອນບໍ່ຄົບທັງ 9 ວິຊາຂາດຄູສອນ 4 ວິຊາ. ເຮັດໃຫ້ຂໍ້ແຂ່ງຂັນທີ່ກະຊວງສຶກສາທິການແລະກິລາກຳນົດ “ສອນດີຮຽນເກັ່ງ” ເພື່ອພັດທະນາຊັບພະຍາກອນມະນຸດນັ້ນບໍ່ສາມາດປະຕິບັດໄດ້ເນື່ອງຈາກໂຮງຮຽນບໍ່ສາມາດສົ່ງນັກຮຽນສອບເສັງແຂ່ງຂັນນັກຮຽນເກັ່ງໃນສາຍວິຊາທີ່ຂາດຄູສອນໄດ້, ໂດຍສະເພາະນັກຮຽນເຂດຫ່າງໄກສອກຫຼີກ. ດັ່ງຄູມັດທະຍົມສຶກສາຈາກເຂດຫ່າງໄກສອກຫຼີກແຂວງອຸດົມໄຊກ່າວຕໍ່ວິິທຍຸເອເຊັຽເສຣີໃນວັນທີ 18 ຕຸລານີ້ວ່າ:

“ຄູຢູ່ຫ້ອງໜຶ່ງມັນຕ້ອງ 9 ວິຊາ 9 ຄົນ, ບາດນີ້ນັກຮຽນມີແຕ່ 40 ມາສະເລັ່ຍໂດຍລວມແມ່ນເຫຼືອການຮຽນການສອນມັນກໍ່ໄດ້ບາງສາຍເຄມີຈັ່ງຊິ. ເອົາແຕ່ລະປີເອົານັກຮຽນບໍາລຸງຮຽນເກັ່ງເດີ້ໄປເສັງໄປແຂ່ງມັນກໍ່ສິໄປໄດ້ຈັ່ງໃດ, ແມ່ພີມຫັ້ນມັນກໍ່ເປັນແມ່ພີມທີ່ນໍາມຶກມັນບໍ່ຄ່ອຍແຈ້ງປານໃດແດ່, ຄູຫອບຫຼາຍຕໍາລາມັນບໍ່ມີໂອກາດທີ່ຈະຄົ້ນຄ້ວາບົດຮຽນ.”

ທ່ານກ່າວຕື່ມວ່າ, ບັນຫາຄູເຫຼືອບໍ່ພໍເປັນສາເຫດໜຶ່ງທີ່ເຮັດໃຫ້ໂຄຕ້າລັດຖະກອນຄູຫຼຸດລົງ. ຍ້ອນຂັ້ນເທີງໄລ່ໃສ່ອັດຕາສ່ວນຄູຕໍ່ນັກຮຽນຄືຄູ 1 ຄົນຕໍ່ນັກຮຽນຊັ້ນມັດທະຍົມສຶກປະມານ 30 ຄົນຕໍ່ຫ້ອງ. ແຕ່ຂັ້ນເທີງບໍ່ໄດ້ໄລ່ອັດຕາສ່ວນຄູຕໍ່ວິຊາທີ່ສອນເຮັດໃຫ້ໂຮງຮຽນທີ່ຕົນເອັງສອນຢູ່ຂາດຄູສອນ 4 ວິຊາ ປະກອບມີ ວິຊາເຄມີ, ສັງຄົມ, ພະລະແລະໄອທີ. ປັດຈຸບັນຈຶ່ງເອົາຄູທີ່ຈົບວິຊາບໍ່ກົງກັບສາຍເອົາມາສອນທີ່ຂາດຈຶ່ງເຮັດໃຫ້ການຮຽນການສອນບໍ່ມີຄຸນນະພາບ.

ສ່ວນແຂວງຊຽງຂວາງໂຮງຮຽນປະຖົມກໍ່ມີບັນຫາຄູເຫຼືອບໍ່ພໍເຮັດໃຫ້ຄູ 1 ຄົນສອນນັກຮຽນ 2 ຊັ້ນຮຽນຫຼືສອນຄວບຫ້ອງເປັນຕົ້ນໂຮງຮຽນປະຖົມສັນຄໍາ, ເມືອງຄໍາ, ແຂວງຊຽງຂວາງ. ຄູ 1 ຄົນຕ້ອງໄດ້ສອນນັກຮຽນຊັ້ນ ປ.1 ແລະ ຊັ້ນປ.2 ທັງໝົດ 40 ຄົນ. ເນື່ອງຈາກນັກຮຽນມີຈຳນວນໜ້ອຍຈຶ່ງຕ້ອງຄວບຫ້ອງສອນເຮັດໃຫ້ມີນັກຮຽນຮຽນອ່ອນຮຽນບໍ່ທັນໝູ່. ຂະນະທີ່ຕາມຫຼັກວິຊາການການຮຽນການສອນລະດັບຊັ້ນປະຖົມສຶກສາຄູ 1 ຄົນຕໍ່ນັກຮຽນປະມານ 30 ຄົນລົງມາ. ດັ່ງຄູຊັ້ນປະຖົມເຂດຫ່າງໄກສອກຫຼີກແຂວງຊຽງຂວາງກ່າວວ່າ.

“ຄວບຫ້ອງເລີຍນັກຮຽນໜ້ອຍຫັ້ນນນ່າເນາະຊັ້ນ ປ.1, ປ.2 ໃຫ້ມັນລະອຽດເທົ່າຢູ່ຫ້ອງດຽວຫັ້ນມັນກໍ່ບໍ່ເທົ່າຫັ້ນແຫຼະເນາະເພາະວ່າຄູມັນບໍ່ມີເວລາຈະຢູ່ກັບນໍາຮຽນກະດານອັນດຽວເນາະແມ່ນປີ້ນໄປປີ້ນມາເວລາສິສອນໜັງສືນນັກຮຽນເກັ່ງນີ້ກໍ່ນັກຮຽນອ່ອນນີ້ກໍ່ຂ້ອນຂ້າງວ່າຫຍຸ້ງຍາກສ້າງກິດຈະກຳ ປ.1 ແລ້ວເຮົາໄປກິດຈະກຳ ປ.2 ເຕັມຊົ່ວໂມງກໍ່ 45 ນາທີ່ກໍ່ແບ່ງໃຫ້ຫ້ອງລະ 20 ປາຍນາທີເນາະຕໍ່ຊົ່ວໂມງ( ການສອນຕໍ່ໜຶ່ງວິຊາ 8).”

ໂຮງຮຽນປະຖົມໃນເຂດຫ່າງໄກສອກຫຼີກແຂວງຜົ້ງສາລີບາງແຫ່ງທີ່ມີນັກຮຽນຊົນເຜົ່າເຂົ້າຮຽນກໍ່ຜະເຊີນບັນຫາຄູເຫຼືອບໍ່ພໍຈົນເຮັດໃຫ້ນັກຮຽນຮຽນອ່ອນ. ດັ່ງເຈົ້າໜ້າທີ່ແຂວງຜົ້ງສາລີກ່າວວ່າ.

“ຄູປະຖົມໃນການຮຽນເນາະ 30 ຄົນຕໍ່ຫ້ອງເດ້ເຊີ່ງມີນັກຮຽນນີ້ບໍ່ຮອດບາງບ້ານມີແຕ່ 10 ຄົນ, 6 ຄົນ. ນັກຮຽນນີ້ ປ.1, ປ.2, ປ.3 ບາງເທື່ອນັກຮຽນບໍ່ມີ ປ.1 ບາງເທື່ອ ປ.2, ປ.3, ປ.4 ບາດນີ້ຄູຫັ້ນສອນຫຼາຍຫ້ອງຄຸນນະພາບມັນຕໍ່າ. ສອນບໍ່ໝົດໂຄງການນ່າເວົ້າຄວາມຈ້ງແລ້ວກໍ່ຈົບ ປ.5 ອ່ານກໍ່ຍັງບໍ່ທັນໄດ້ນ່່າຂຽນບໍ່ເປັນຄິດໄລ່ເລກບໍ່ໄດ້ເທື່ອ.”

ກ່ຽວກັບສະພາບການຄູເຫຼືອ ບໍ່ພໍທ່ານນາຍົກລັດຖະມົນໄດ້ກ່າວວ່າ, ໃຫ້ເອົາໃຈໃສ່ແມ່ພີມທີ່ດີຂອງຊາດເພື່ອຮັບປະກັນວ່ານັກຮຽນທີ່ຮຽນອ່ອນ, ຮຽນບໍ່ທັນໝູ່ຈະໄດ້ຮັບການບໍາລຸງຄືນໃໝ່ນັ້ນ, ສະພາບຕົວຈິງຢູ່ບາງແຂວງເປັນຕົ້ນແຂວງສະຫວັນນະເຂດມີການຝຶກອົບຮົມຫຼັກສູດທົບທວນ, ສຳມະນາໃຫ້ຄູ. ແຕ່ເມື່ອປະຕິບັດຕົວຈິງຄູບໍ່ສາມາດໃຫ້ຄວາມຮູ້ທີີ່ຝຶກອົບຮົມໄດ້ 100% ຍ້ອນຄູຜູ້ໜຶ່ງຕ້ອງໄດ້ສອນຫ້ອງຄວບຫຼາຍຫ້ອງ. ດັ່ງເຈົ້າໜ້າທີ່ແຂວງສະຫວັນນະເຂດກ່າວວ່າ.

“ການເຮັດໜ້າທີ່ຂອງຄູເຮົາຢູ່ເຂດນອກນີ້ຍັງບໍ່ທັນເປັນ 100 ຫັ້ນນ່າ, ຖືວ່າການຝຶກກໍ່ມີເວລາກໍ່ມີຫັ້ນແຫຼະມາເຜີຍແຜ່ແຕ່ວ່າ ຫຼັງຈາກມາແລ້ວເມືອກັບບ້ານມັນກໍ່ເຮັດວຽກແບບວ່າ ຈັບປື້ມສອນໂລດນ່າ. ເຂົາເຈົ້າບໍ່ທັນໄດ້ແຕ່ງບົດສອນອີ່ຫຍັງຕ່າງໆ ດອກ, ຄູເຮົາກໍ່ອອກບຳນານນໍາແດ່ແຕ່ເຂົ້າບໍານານນໍາແດ່ໂກຕ້າກໍ່ໜ້ຍໂຕນີ້ຖ້າບໍ່ມີອາສາອຳມະພາດເລີຍ.”

ວັນທີ 16 ຕຸລາ 2024 ຜ່ານມາ ເນື່ອງໃນໂອກາດສະຫຼອງວັນຄູແຫ່ງຊາດ ວັນທີ 07 ຕຸລາ 2024 ຄົບຮອບ 30 ປີ ທ່ານ ສອນໄຊ ສີພັນດອນ ນາຍົກລັດຖະມົນຕີ ກ່າວວ່າ

ການຈັດຕັ້ງຜັນຂະຫຍາຍແຜນພັດທະນາການສຶກສາ, ວິທະຍາສາດ ແລະ ກິລາໂດຍສະເພາະແມ່ນຮັບປະກັນການສໜອງການສຶກສາໃຫ້ມີຄຸນນະພາບແລະສາມາດເຂົ້າເຖີງປະຊາຊົນບັນດາເຜົ່າໃນສະພາບການທີ່ມີຄວາມທ້າທາຍຫຼາຍສີ່ງຕໍ່ຂະແໜງການສຶກສາແລະກິລາ, ພວກເຮົາບໍ່ອາດຈະປະໃຫ້ຄູຜະເຊີນກັບສີ່ງທ້າທາຍນັ້ນພຽງລຳພັງ.

ສະນັ້ນຈຶ່ງຮຽກຮ້ອງ ມາຍັງທຸກພາກສ່ວນຕ້ອງໄດ້ຮ່ວມມືກັນເປັນຕົ້ນ,ໃຫ້ຜູ້ບໍລິຫານການສຶກສາ ແລະກິລາທຸກຂັ້ນຈົ່ງເພີ່ມທະວີຄວາມຮັບຜິດຊອບຕໍ່ໜ້າວຽກຂອງຕົນ. ເອົາໃຈໃສ່ພັດທະນາຊັບພະຍາກອນມະນຸດໃຫ້ມີຄຸນນະພາບໃຫ້ໄດ້ມາດຕະຖານ 3 ລັກສະນະແລະ 5 ຫຼັກມູນຂອງການສຶກສາ. ຕິດພັນກັບຂໍ້ແຂ່ງຂັນຮັກຊາດແລະພັດທະນາຄື ສອນດີຮຽນເກັ່ງ, ສ້າງສະພາບແວດລ້ອມທີ່ດີໃນສະຖານການສຶກສາ, ພ້ອມກັນຕ້ານປະກົດການຫຍໍ້ທໍ້ ຕ່າງໆໂດຍສະເພາະແມ່ນບັນຫາຢາເສບຕິດ ແລະຄ່ານິຍົມທີ່ຜິດເຂວ.