ນັກຮຽນຊັ້ນປະຖົມ ປະລະການຮຽນ ເນື່ອງຈາກ ໂຮງຮຽນ ບໍ່ມີໂຄງການອາຫານເທື່ອ

ເດັກນ້ອຍນັກຮຽນ ປ.1 ຫາ ປ.5 ຈໍານວນບໍ່ໜ້ອຍ ປະເຊີນກັບບັນຫາ ຂາດຮຽນ, ຂາດສານອາຫານ ແລະປະລະການຮຽນ ຍ້ອນບໍ່ມີໂຄງການອາຫານທ່ຽງ. ສ່ວນໂຮງຮຽນ ທີ່ມີອາຫານທ່ຽງ ແມ່ນໄດ້ເງິນ ຈໍານວນ 1,000 ກີບ ຕໍ່ຄົນຕໍ່ຄາບ ທີ່ລັດຖະບານ ໃຫ້ປຸງແຕ່ງອາຫານນັ້ນ ແມ່ນບໍ່ພຽງພໍ.

ເປັນຕົ້ນ, ຢູ່ເຂດບ້ານມົກຫວັດ ເມືອງປາກແບງ ແຂວງອຸດົມໄຊ ມີໂຮງຮຽນປະຖົມ 3 ແຫ່ງ ບໍ່ມີໂຄງການອາຫານທ່ຽງ, ຈຶ່ງເຮັດໃຫ້ນັກຮຽນຊັ້ນປະຖົມສຶກສາ ໃນເຂດນັ້ນ ຂາດຮຽນ ຈົນກາຍເປັນເດັກນ້ອຍ ປະລະການຮຽນ ແລະເດັກນ້ອຍ ຄ້າງຫ້ອງ, ດັ່ງນາຍຄູ ຊັ້ນປະຖົມ ຢູ່ເມືອງປາກແບງ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 25 ພະຈິກ ນີ້ວ່າ:

“ຄັນວ່າ ມີໂຄງການອາຫານທ່ຽງ, ຖືວ່າ ເປັນຜົນດີຫັ້ນແຫຼະ ມັນຈະຫຼຸດຜ່ອນອັນນ່າ ການຂາດຮຽນແດ່ ນັກຮຽນເຂົາຊິມາໂຮງຮຽນ ປົກກະຕິຫັ້ນແຫຼະ ການປະລະການຮຽນນີ້ ກະຊິຫຼຸດລົງ ກະຊິຫຼຸດຜ່ອນລົງ 9 ປີ 10 ປີ ບາງທີ ກະຊິຢູ່ຫ້ອງ ປ.4 ປ.5 ເຂົາເຈົ້າ ຊ່ວງວຽກຊື່ໆ ຊ່ວງເກັບກ່ຽວ ເຂົາເຈົ້າກະຊິໄປເອົານ້ອງ ສ່ວນຫຼາຍ ເຂດນອກນີ້ລະແມ່ນ ມັນຢາກຄ້າຍໆຄືກັນໝົດ.”

ຢູ່ໂຮງຮຽນປະຖົມສໍາພັນ ເມືອງຄໍາ ແຂວງຊຽງຂວາງ ກໍ່ເປັນອີກໜຶ່ງ ໃນໂຮງຮຽນ ທີ່ບໍ່ມີໂຄງການອາຫານທ່ຽງ, ເຮັດໃຫ້ເດັກນ້ອຍນັກຮຽນ ປ.1 ຫາ ປ.5 ຈໍານວນໜຶ່ງ, ທີ່ເປັນເດັກນ້ອຍ ຈາກຄອບຄົວທຸກຍາກ, ຂາດສານອາຫານ ແລະຂາດໂຮງຮຽນເປັນປະຈໍາ ຈົນຜົນການຮຽນ ບໍ່ດີ, ດັ່ງນາຍຄູ ສອນຊັ້ນປະຖົມສຶກສາ ຢູ່ເມືອງຄໍາ ນາງໜຶ່ງ ກ່າວວ່າ:

“ມັກຂາດໂຮງຮຽນນີ້ມີຢູ່ ມື້ນີ້ ເຂົາເຈົ້າກະມາ ບໍ່ມາເປັນຊົ່ວໂມງ ຫຼືວ່າ ບໍ່ມາເປັນມື້ ເປັນນັ້ນຫັ້ນນ່າ ຂາດສານອາຫານກໍມີ ຈ່ອຍບໍ ບໍ່ຕຸ້ຍສົມສ່ວນຫັ້ນນ່າ ແບບວ່າເຮືອນນັ້ນ ມັນຈະມີຫຼາຍຄົນ ເສດຖະກິດທຸກມື້ນີ້ ກະຄື ອັນໃດກະແພງ ຈະບໍ່ພຽງພໍຕໍ່ຄວາມຕ້ອງການ ຂອງຮ່າງກາຍ ບໍ່ເຄີຍມີ ແບບໂຄງການອາຫານທ່ຽງເຂົ້າມາ. ຄັນວ່າ ເຮົາມີໂຄງການອາຫານທ່ຽງເຂົ້າມາເນາະ, ນັກຮຽນເຂົາເຈົ້າຈະບໍ່ຂາດ ເພາະວ່າ ມັນຈູງໃຈ ໃຫ້ນັກຮຽນນັ້ນ ຢາກມາໂຮງຮຽເນາະ ຢາກມາກິນອາຫານ.”

ຂະນະດຽວກັນ ຢູ່ກອງປະຊຸມ ສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ 9 ໃນມື້ວັນທີ 21 ພະຈິກ 2024 ທີ່ຜ່ານມານີ້, ທ່ານ ບຸນຕາ ເທບພະວົງ ປະທານກໍາມາທິການ ວັດທະນະທໍາ-ສັງຄົມ ສະເໜີຕໍ່ລັດຖະບານ ໃຫ້ສູ້ຊົນ ຂະຫຍາຍໂຄງການອາຫານທ່ຽງ ໃນໂຮງຮຽນເພີ່ມຂຶ້ນ.

ເຖິງຢ່າງໃດກໍ່ຕາມ ສໍາລັບໂຄງການອາຫານທ່ຽງ ທີ່ເຄີຍສະໜັບສະໜູນ ໂດຍອົງການອາຫານໂລກ ແລ້ວຖືກມອບໝາຍໃຫ້ລັດຖະບານລາວ ສືບຕໍ່ໂຄງການອາຫານທ່ຽງ ໃນປີ 2022 ເປັນຕົ້ນມານັ້ນ ແມ່ນເງິນ 1,000 ກີບ ຕໍ່ຄົນຕໍ່ຄາບ ທີ່ລັດຖະບານ ໃຫ້ປຸງແຕ່ງອາຫານ ຢູ່ໂຮງຮຽນປະຖົມ ບ້ານຫາດສາ ເມືອງຜົ້ງສາລີ ແຂວງຜົ້ງສາລີ ແມ່ນບໍ່ພຽງພໍ, ດັ່ງນາຍຄູ ຢູ່ເມືອງຜົ້ງສາລີ ນາງໜຶ່ງກ່າວວ່່າ:

“ທາງໂຮງຮຽນ ກະເປີດກອງປະຊຸມ ແລ້ວກະ ພໍ່ແມ່ ຫັ້ນ 2,000 ກີບ ກໍລັດຖະບານ 1,000 ກີບ ພໍ່ແມ່ເຂົາເຈົ້າມາແຕ່ງໝຸນວຽນ ມາຕົກຢູ່ໃນປີນີ້ ອັດຕາເງິນເຟີ້ເພີ່ມຂຶ້ນ ແລ້ວກະຊື້ຫຍັງກະບໍ່ໄດ້ ລະກໍແຕ່ງ 3 ມື້ ຢູ່ໃນອາທິດໜຶ່ງຫັ້ນ, ມື້ໜຶ່ງ 2,000 ກີບ ຕໍ່ຄົນຕໍ່ຄາບ ແລ້ວກໍ ທາງໂຮງຮຽນ ກະເຮັດສວນເຮືອນຮົ່ມ ບາງເທື່ອນີ້ກໍຊິຊື້ຊີ້ນ ປົນໃສ່ໃຫ້ກິນຫັ້ນແຫຼະ.”

ຍານາງ ກ່າວມ້ວນທ້າຍວ່າ ແຕ່ໂຄງການອາຫານທ່ຽງເຂົ້າມາ ເຮັດໃຫ້ໂຮງຮຽນຂອງຍານາງ ບໍ່ມີນັກຮຽນຂາດຮຽນ ແລະ ປະລະການຮຽນ. ຍານາງ ຈຶ່ງເຫັນດີ ຕໍ່ຄໍາສະເໜີ ຂອງທ່ານ ບຸນຕາ ເທບພະວົງ ຈະໃຫ້ລັດຖະບານ ເພີ່ມເງິນໂຄງການອາຫານທ່ຽງ ຈາກ 1,000 ກີບ ຕໍ່ຄົນຕໍ່ຄາບຂຶ້ນຕື່ມ ໂດຍຍານາງ ຢາກໃຫ້ຂຶ້ນ 3,000 ກີບ ຕໍ່ຄົນຕໍ່ຄາບ ເຖິງຈະມີຄວາມເໝາະສົມ.