ທົ່ວປະະເທດ ປະລະການຮຽນສູງເຖິງ ກ່ວາແສນ ຄົນພາຍໃນ 3 ປີ

ໃນລະຫວ່າງ 3 ສົກຮຽນ ແຕ່ປີ 2021 ຫາ ປີ 2024 , ມີນັກຮຽນຊັ້ນປະຖົມຈົນເຖີງມັດທະຍົມປາຍທົ່ວປະເທດປະລະການຮຽນເພີ່ມຂື້ນທຸກສົກຮຽນ. ໂດຍສະເພາະໃນສົກຮຽນຫຼ້າສຸດປີ 2023-2024 ນັກຮຽນຊັ້ນ ປ.1 ຫາ ມ.7 ມີການປະລະການຮຽນທັງໝົດ 106,738 ຄົນ.

 ຂະນະທີ່ສົກຮຽນກ່ອນໜ້ານັ້ນຄືສົກຮຽນ 2022-2023 ໃນທົ່ວປະເທດມີນັກຮຽນປະລະການຮຽນແຕ່ ປ.1 ຫາ ມ.7 ຈຳນວນ 100,829 ຄົນ, ແລະ ສົກຮຽນ 2021-2022 ມີນັກຮຽນ ປ.1 ຫາ ມ.7 ປະລະການຮຽນທັງໝົດ 101,764 ຄົນ.

 ຈໍານວນຕົວເລກການປະລະການຮຽນໃນສົກຮຽນປີ 2023-2024 ສູງກ່ວາຕົວເລກສົກຮຽນກ່ອນໜ້ານີ້ຄືສົກຮຽນປີ 2022-2023 ແລະ ສົກຮຽນປີ 2021-2022 ຈຳນວນ 4,977 ຄົນ ແລະ 5,909 ຄົນ.ໂດຍແຂວງສະຫວັນນະເຂດສົກຮຽນປີ 2022-2023 ເປັນແຂວງທີ່ມີນັກຮຽນ ປ.1 ຫາ ມ.7 ປະລະການຮຽນຫຼາຍກ່ວາໝູ່.

ກ່ຽວກັບເລື່ອງນີ້, ເຈົ້າໜ້າທີ່ກະຊວງສຶກສາທິການແລະກິລາກ່າວໃຫ້ຄຳເຫັນຕໍ່ກໍລະນີການປະລະການຮຽນວ່າ, ການປະລະການຮຽນເພີ່ມຂື້ນທຸກສົກຮຽນຈະເຮັດໃຫ້ໃນໄລຍະຕໍ່ໜ້ານີ້ປະເທດລາວຈະຂາດກຳລັງແຮງງານ, ມາເປັນລັດຖະກອນ ແລະ ພົບເຫັນການໃຊ້ແຮງງານລາວອາຍຸບໍ່ເຖີງ 18 ປີ ຢູ່ຕາມໂຮງຈັກໂຮງງານພາຍໃນປະເທດ ແລະ ຕ່າງປະເທດ. ດັ່ງເຈົ້າໜ້າທີ່ກະຊວງສຶກສາກ່າວວ່າ.

“ເລື່ອງຜົນກະທົບມັນກໍ່ມີຫຼາຍດ້ານແທ້ຫັ້ນແຫຼະ, ບໍ່ກະທົບໃນໄລຍະໄກ້, ມັນກໍ່ກະທົບໃນໄລຍະໄກຄືກັນ. ຕໍ່ໄປເຮົາກໍ່ສິຂາດເຂີນພະນັກງານນີ້ແຫຼະ. ເວົ້າເລື່ອງດ້ານຄູພວກເຮົາສຶກສາພວກເຮົານີ້ມັນກໍ່ໄລຍະນີ້ຂາດເຂີນ, ຕໍ່ໄປມັນກໍ່ຫຍີ່ງຊາດເຂີນໄປຕໍ່ໜ້າຫັ້ນ. ສ່ວນມັດທະຍົມນີ້ສາມາດເປັນແຮງງານແລ້ວ, ເຂົາເຈົ້າກໍ່ໄປຕາມໂຮງຈັກໂຮງງານແລ້ວ, ຜູ້ທີ່ສາມາດອອກໄປໄດ້ກໍ່ໄປຫາຢູ່ຕ່າງປະເທດພຸ້ນໝົດ, ຈັ່ງສິຫ້າມກັນແນວໃດໄດ້.”

 ສະເພາະສົກຮຽນ 2023-2024 ນັກຮຽນຊັ້ນປະຖົມປະລະການຮຽນຫຼາຍກ່ວາໝູ່ເປັນອັນດັບທຳອິດແມ່ນເມືອງເຊໂປນທີມີນັກຮຽນຊັ້ນ ປ.1 ຫາ ປ.5 ປະລະການຮຽນເຖີງ 1,438 ຄົນ. ຮອງລົງມາກໍ່ແມ່ນເມືອງພິນ ແຂວງສະຫວັນນະເຂດ ປ.1 ຫາ ປ.5 ປະລະການຮຽນ 1,432 ຄົນເຊີ່ງເປັນຈໍານວນທີ່ບໍ່ໄດ້ຫຼຸດລື່ນກັນປານໃດ. ສ່ວນນັກຮຽນຊັ້ນປະຖົມປະລະການຮຽນແຕ່ຍັງນ້ອຍແນວນີ້ຈະເຮັດໃຫ້ທັກສະການອ່ານ, ຂຽນ ແລະ ຄິດໄລ່ເລກພື້ນຖານຂອງນັກຮຽນປະຖົມຕໍ່າ, ນັກຮຽນປະຖົມຖືກໃຊ້ແຮງງານແຕ່ຍັງນ້ອຍໂດຍຄອບຄົວຂອງເຂົ້າເຈົ້າ. ດັ່ງເຈົ້າໜ້າທີ່ເມືອງພິນກ່າວວ່າ.

“ຄຸນນະພາບການຮຽນນີ້ມັນກໍ່ຂ້ອນຂ້າງວ່າຕໍ່າ, ມາຮຽນຫຼ້າຊ້າ, ມາຮຽນນໍາຫຼັງຖ້າວ່າມາຮຽນນໍາຫຼັງແລ້ວບາດນີ້ມັນຮຽນບໍໄດ້ ເນາະ. ຮຽນບໍ່ໄດ້ບາງເທື່ອມັນອາດຈະອາຍໝູ່ແລ້ວມັນຈະອອກໄປໂຕມັນເອັງ. ຊົນເຜົ່າຜູ້ປົກຄອງຫັ້ນນໍາໃຊ້ແຮງງານເດັກຫັ້ນມັນເກີນໄປ, ເຂົາບໍ່ນຶກເຖີງອະນາຄົດຂອງລູກຂອງຫຼາຍເຂົາ, ເຂົາມີແຕ່ວ່າຢາກໃຫ້ລູກຫຼາຍໄປຊ່ວຍລ້ຽງງົວລ້ຽງຄວາຍບໍ່, ໄປຊ່ວຍກ່ຽວເຂົ້າກ່ຽວນານໍາເຂົາ, ຊ່ວຍເອົານ້ອງ 7-8-9 ປີເຂົ້າເຮັດວຽກຊ່ວຍພໍ່ແມ່ແລ້ວເດ້ສຳລັບຊົນເຜົ່າ.”

ທ່ານກ່າວຕື່ມວ່າ, ສ່ວນຫຼາຍນັກຮຽນຊົນເຜົ່າຢູ່ເມືອງພິນຈະເປັນກຸ່ມໃຫຍ່ທີ່ປະລະການຮຽນແຕ່ເດືອນເມສາເຖີງເດືອນພະຈິກຂອງທຸກປີ. ເນື່ອງຈາກເປັນລະດູການຜະລິດແລ້ວພໍ່ແມ່ພາລູກໄປນອນຢູ່ໄຮ່ຢູ່ນາເພື່ອສ້າງລາຍໄດ້ໃຫ້ຫຼຸດພົ້ນຈາກຄວາມທຸກຍາກ. ຂະນະທີ່ບ່ອນເຮັດ ການຜະລິດກັບໂຮງຮຽນຢູ່ຫ່າງກັນຫຼາຍກິໂລແມັດ, ຖ້າຂັ້ນເທີງບໍ່ມີແຜນຈັດສັນບ້ານນ້ອຍລວມບ້ານໃຫຍ່ກໍ່ຈະເຮັດໃຫ້ອັດຕາປະລະການຮຽນປະຖົມມີທ່າອ່ຽງເພີ່ມຂື້ນ.

 ສ່ວນເມືອງຈໍາພອນ ແຂວງສະຫວັນນະເຂດມີນັກຮຽນຊັ້ນມັດທະຍົມແຕ່ ມ.1 ຫາ ມ.4 ຈຳນວນ 1,058 ຄົນ ປະລະການຮຽນຫຼາຍກ່ວາໝູ່ເປັນອັນດັບທຳອິດໃນສົກຮຽນ 2023-2024 ແລະ ເມືອງສາລະວັນເປັນອັນດັບ 2 ຢູ່ທີ່ 924 ຄົນ. ດັ່ງເຈົ້າໜ້າທີ່ເມືອງຈໍາພອນກ່າວວ່າ.

“ມັນກໍບໍ່ຖີ້ມໃຫ້ແຕ່ສຶກສາເຮົາແຫຼະ, ກໍ່ຖີ້ມຫຼາຍພາກສ່ວນແຫຼະຄືສັງຄົມນັກຮຽນເຮົາມີຫຍັງຂີ່ລົດໃຊ້ສຽງດັງ, ອາລະວາດມີຫຍັງເຂົ້າຮ້ານບັນເທີງ, ຖີ້ມໃຫ້ສຶກສາເຮົາເປັນຜູ້ອົບຮົມເປັນຜູ້ເວົ້າມັນກາບໍ່ໄດ້ແຫຼະ. ຄັນວ່າສັງຄົມຫຼືວ່າຄອບຄົວບໍ່ເວົ້າບໍ່ວ່ານໍາກັນຫັ້ນນ່າ.”

ສ່ວນເມືອງໄຊທານີນະຄອນຫຼວງວຽງຈັນ, ມີນັກຮຽນມັດທະຍົມປາຍແຕ່ ມ.5 ຫາ ມ.7 ຈຳນວນທັງໝົດ 533 ຄົນ, ປະລະການຮຽນຫຼາຍກ່ວາໝູ່ເປັນອັນດັບທີໜຶ່ງໃນສົກຮຽນ 2023-2024, ສ່ວນນະຄອນໄກສອນພົມວິຫານ, ແຂວງສະຫວັນນະເຂດເປັນອັນດັບທີ ສອງ 525 ຄົນ. ນັກຮຽນມັດທະຍົມປາຍປະລະການຮຽນເຊັ່ນນີ້ຈະເຮັດໃຫ້ການສຶກສາຕົກຕໍ່າກ່ວາເກົ່າ, ນັກຮຽນພາກັນສ້າງຄອບຄົວແຕ່ຍັງນ້ອຍ, ຊັບພະຍາກອນມະນຸດຂອງປະເທດຢູ່ຊັ້ນກຳມະກອນຫຼາຍກ່ວາຊັ້ນວິຊາການແລະຄວາມບໍ່ເປັນໜັງສືສົ່ງຕໍ່ໄປເຖີງລູກ. ດັ່ງຄູສອນນັກຮຽນຊົນເຜົ່ານະຄອນໄກສອນພົມວິຫານກ່າວວ່າ.

“ການຮໍ່າຮຽນເຮົາຕົກຕໍ່າແຫຼະລຸດກ່ວາເກົ່າ, ຄວາມຮູ້ຄວາມສາມາດກໍ່ສິບໍ່ເທົ່າຮຽນຄືແຕ່ກ່ອນ. ເພາະວ່າມັນຫຼຸດໜ້ອຍຖອຍລົງມີແຕ່ໄປສ້າງຄອບຄົວໝົດຫັ້ນແຫຼະ, ຄົນບ້ານນອກຜູ້ຍີງນີ້ຄັນວ່າຮອດ 20 ປີ 19 ປີກໍ່ເອີ້ນວ່າເຖົ້າແລ້ວເດ້ເຂົານ່າເວົ້າຢອກກັນ, ໄດ້ເປັນກຳມະກອນຫັ້ນແຫຼະບໍ່ໄດ້ເປັນວິຊການ, ບໍ່ໄດ້ເປັນການນໍານໍາເຂົາດອກຈົບອອກໄປກໍ່ສ້າງຈົບກໍ່ໄດ້ເປັນພໍ່ແມ່ພໍ່ແມ່ກໍບໍ່ໄດ້ເປັນໜັງສືຄືເກົ່າກັບລູກຫັ້ນແຫຼະຄືສີດົນຢູ່ກ່ວາເຂົາຈະຕື່ນຕົວ.”

 ທ່ານກ່າວຕື່ມວ່າການປະລະການຮຽນຄືນັກຮຽນມາຮຽນໄດ້ໄລຍະໜຶ່ງ, ບໍ່ຈົບຊັ້ນຮຽນແລ້ວກໍ່ປະລະການຮຽນໄປເລີຍ. ເຊີ່ງສ່ວນຫຼາຍກໍ່ບໍ່ກັບເຂົ້າມາຮຽນອີກແລະການປະລະການຮຽນເພີ່ມຂື້ນມີມາແຕ່ໄລຍະການແຜ່ລະບາດຂອງໂຄວິດ-19. ຮອດປັດຈຸບັນປະເທດລາວຜະເຊີນບັນຫາເສດຖະກິດການເງິນ.

ສຳລັບການຮຽນ 2024-2025 ຍັງບໍ່ມີຈຳນວນນັກຮຽນປະລະການຮຽນທົ່ວປະເທດເທື່ອ, ຕ້ອງໄດ້ລໍຖ້າການລວບລວມທັງໝົດຈາກບັນດາແຂວງທົ່ວປະເທດພາຍຫຼັງກະຊວງສຶກສາທິການແລະກິລາແຈກເຈັ້ຍຮີບໂຮມຂໍ້ມູນແລ້ວ. ເຊີ່ງຊ້າສຸດປະມານເດືອນມັງກອນເຖີງຈະຮູ້ຕື່ມ. ປັດຈຸບັນກະຊວງສຶກສາທິການແລະກິລາໄດ້ຮັບຮູ້ເຖີງບັນຫານັກຮຽນ ປ.1 ຫາ ມ.7 ປະລະການຮຽນທົ່ວປະເທດ ແລະ ລໍຖ້າຜົນວິໄຈຢ່າງເປັນທາງການວ່າຈະສົ່ງຜົນກະທົບແນວໃດ. ຖ້ານັກຮຽນພາກັນປະລະການຮຽນເພີ່ມຂື້ນຢ່າງຕໍ່ເນື່ອງຍ້ອນບໍ່ແມ່ນນັກຮຽນລະດັບປະຖົມແລະສາມັນທີ່ປະລະການຮຽນແລ້ວແຕ່ລວມໄປເຖີງນັກຮຽນສາຍວິຊາຊິບນໍາດ້ວຍ. ອີງຕາມຂໍ້ມູນຈາກຫ້ອງການກະຊວງສຶກສາທິການແລະກິລາ.