ເຂດນອກ ປື້ມແບບຮຽນ ບໍ່ພຽງພໍ

ມາຮອດປັດຈຸບັນນັກຮຽນຊັ້ນປະຖົມແລະມັດທະຍົມຈຳນວນຫຼາຍໃນຫຼາຍເມືອງຫຼາຍແຂວງທົ່ວປະເທດ, ຍັງບໍ່ທັນມີປື້ມແບບຮຽນຄົບຊຸດສຳລັບຮຽນຢູ່ໂຮງຮຽນແລະທົບທວນຢູ່ເຮືອນ. ຂະນະທີ່ຄູມີແຕ່ຄູ່ມືສອນແລະຈຳເປັນຕ້ອງໄດ້ຂຽນໃສ່ກະດານໃຫ້ນັກຮຽນຈົດຕາມ. ດັ່ງຄູສອນວິຊາພາສາລາວໂຮງຮຽນປະຖົມແຂວງພາກເໜືອກ່າວຕໍ່ວິທຍຸເອເຊັຽເສຣີໃນວັນທີ 18 ຕຸລາ 2024 ວ່າ.

“ແຕ່ລະວິຊາມັນບໍ່ຄືກັນເນາະ, ບາງວິິຊາກໍ່ພໍຢູ່ບາງວິຊາກໍ່ບໍ່ພໍແລ້ວແບບຄືວ່າເວລາຂື້ນຫ້ອງຫັ້ນໄດ້ເອົາມານໍາແລ້ວແລ້ວກໍ່ມີແຕ່ຂື້ນຫ້ອງແລ້ວແລ້ວກໍ່ເອົາມາວຽນອີກ. ປື້ມໃຫ້ນີ້ກໍ່ບໍ່ສັ່ງໃໝ່ແລ້ວເພາະວ່ານັກຮຽນກໍ່ບໍ່ປື້ມຄົບແລ້ວກໍ່ຕົ້ນຕໍນີ້ກໍຄູຈົດໃຫ້ນັກຮຽນຢູ່ກະດານແລ້ວກໍ່ໃຫ້ນັກຮຽນຈົດເອົາ, ກໍ່ມີແຕ່່ຄູຈົດໃຫ້ແລ້ວກໍ່ໃຫ້ນັກຮຽນເຂົ້າໄປຄົ້ນຄ້ວາໄປແກ້ວຽກບ້ານອີ່ຫຍັງຕ່າງໆ.”

ສຳລັບນັກຮຽນຜູ້ທຸກຍາກບໍ່ມີເງິນຊື້ປື້ມແບບຮຽນໄດ້, ພວກເຂົາເຈົ້າຈຳເປັນຕ້ອງໄດ້ຢືມປື້ມແບບຮຽນຢູ່ໂຮງຮຽນໂດຍທີ່ບໍ່ສາມາດນໍາກັບມາອ່ານທົບທວນຢູ່ເຮືອນໄດ້. ດັ່ງຄູສອນວິຊາຄະນິດສາດມັດທະຍົມພື້ນທີ່ເຂດນອກກ່າວຕໍ່ວິທຍຸເອເຊັຽເສຣີໃນວັນດຽວກັນວ່າ.

“ກໍ່ບໍ່ພຽງພໍມັນເປັນບາງລາຍວິຊາ, ວິຊາທີ່ຍັງຂາດເປັນຕົ້ນກໍ່ພາສາອັງກິດຖ້າວ່າສາຍອື່ນເຊົ່າວ່າທຸງຊາດປະຫວັດສາດຫັ້ນກໍ່ໜ້າຈະພຽງພໍ. ສ່ວນຫຼາຍເປັນບຸກຄົນນ່າຈະບໍ່ໄດ້ແຕ່ວ່າຢາຍເປັນໂຕະນີ້ໜ້າຈະໄດ້ເນາະ. ອ່າປະມານ 2 ຄົນເນາະໃຊ້ຮ່ວມກັນຖ້າວ່າຢູ່ໂຕະດຽວຢ່າງບໍ່ໄດ້ກໍ່ໂຕະໜຶ່ງໜັ່ງ 3 ຄົນໄດ້ໃຊ້ໄດ້ເບິ່ງນຳກັນ. ຈະບໍ່ມີແບບຮຽນຫັ້ນນ່າກໍ່ມີແຕ່ຄູ່ມືຂອງນາຍຄູກິດຈະກຳສ່ວນຫຼາຍເປັນຄູທີ່ວ່າໃຊ້.”

ຂະນະດຽວກັນນັກຮຽນບາງຄົນກໍ່ຈໍາເປັນຕ້ອງໄດ້ຢືມປື້ມແບບຮຽນຈາກທາງໂຮງຮຽນ,ແຕ່ປື້ມແບບຮຽນທີ່ທາງໂຮງຮຽນມີໃຫ້ຢືມນັ້ນຈຳນວນໜຶ່ງບໍ່ຄົບຊຸດ. ເປັນຕົ້ນແບບຮຽນຊັ້ນປະຖົມ 1 ມີ 5 ວິຊາ, ແຕ່ໂຮງຮຽນມີໃຫ້ຢືມພຽງແຕ່ 3 ວິຊາເທົ່ານັ້ນ. ດັ່ງຜູ້ປົກຄອງນັກຮຽນຢູ່ເມືອງຊໍາເໜືອກ່າວວ່າ.

“ ພີ່ ໆ ນ້ອງ ໆ ເນາະມັນກໍ່ຂ້ອນຂ້າງທີ່ຈະຖືວ່າໃຊ້ໄດ້ແລ້ວກໍ່ດົນ ໆ ຄ່ອຍປ່ຽນເທື່ອ, ແຕ່ວ່າມັນກໍ່ແລ້ວແຕ່ບາງວິຊາເລັ້ມໜາເນາະກໍ່ແພງແນ່. ທີ່ໂຮງຮຽນມັນກໍ່ມີໃຫ້ຢືມເນາະແຕ່ວ່າມັນບໍ່ຄົບຖ້ວນກັນ”

ສ່ວນນັກຮຽນໃນເຂດເມືອງທີ່ບໍ່ທັນມີປື້ມແບບຮຽນ, ທາງໂຮງຮຽນຈະເປີດໃຫ້ເຊົ່າ 10,000ກີບ/ຊຸດ. ສ່ວນນັກຮຽນໃນພື້ນທີ່ເຂດນອກທາງໂຮງຮຽນຈະໃຫ້ຢືມຮຽນແບບບໍ່ເສັຍຄ່າ, ແຕ່ສາມາດນໍາປື້ມແບບຮຽນເມືອເຮືອນໄດ້. ດັ່ງຜູ້ປົກຄອງນັກຮຽນປະຖົມປີ 3 ແລະ ຂາຍປື້ມແບບຮຽນມືສອງທາງອ໋ອນລາຍນ໌ນະຄອນຫຼວງວຽງຈັນກ່າວວ່າ.

“ ໂດຍປັບຂື້ນຫຼາຍເຕີບຢູ່ເພິ່ນກາພີມອອກມາໃຫ້ເຊົ່າໃຫ້ຫຍັງອີກຕ່າງຫາກກາມີ,ໂອ ສໍາລັບຢູ່ໂຮງຮຽນຢູ່ບາງເຂດຢູ່ບາງບ່ອນ 10,000 ກີບ/ຊຸດ ແມ່ນຂອງໂຮງຮຽນ. ສຳລັບຄອບຄົວເສດຖະກິດຄອບຄົວດີແນ່ຂະເຈົ້າກໍ່ບໍ່ເຊົ່າ, ເຂດຢູ່ແຖວຫ່າງໄກສອກຫຼີກແມ່ນເພິ່ນກໍບໍ່່ໃຫ້ເຊົ່າມີແຕ່ຮອດຍາມຮຽນແລ້ວເພິ່ນກໍ່ຢາຍໃຫ້ຮຽນ, ຮອດຍາມເຊົາຮຽນກໍ່ບໍ່ໄດ້ໃຫ້ເອົາເມືອເຮືອນເບິ່ງນຳກັນຢູ່ໂຮງຮຽນ”

ຜູ້ປົກຄອງນັກຮຽນກ່າວຕື່ມວ່າສຳລັບປື້ມແບບຮຽນຈະຖືກນໍາຂາຍໃນໄລຍະກາງເດືອນສິງຫາຫາເດືອນກັນຍາຂອງທຸກປີ. ເນື່ອງຈາກເປັນໄລຍະການເປີດສົກຮຽນໃໝ່, ທັງນີ້ກະຊວງສຶກສາທິການແລະກິລາຈະເປັນຜູ້ກວດແກ້ເແລະຕີພີມປື້ມແບບຮຽນແຕ່ພຽງຜູ້ດຽວເປັນຕົ້ນ, ປື້ມແບບຮຽນປະຖົມ 1 ມີລາຄາ 149,000 ກີບ/ຊຸດ, ແຕ່ຜູ້ຂາຍທີ່ຮັບມາຂາຍຕໍ່ຈະຂາຍໃນລາຄາ 170,000 ກີບ/ຊຸດ.

ປັດຈຸບັນປື້ມແບບຮຽນປະຖົມ 1-5 ແລະ ມັດທະຍົມ 1-7 ມີລາຄາເພີ່ມຂື້ນເລື້ອຍ ໆ ແບບທົບເທົ່າໃນຮອບ 5 ປີມານີ້. ຍ້ອນອັດຕາເງິນເຟີ້ພາຍໃນປະເທດແລະຕ້ອງນໍາເຂົ້າວັດຖຸດິບໃນການຕີພີມຈາກໄທ, ເຮັດໃຫ້ພໍ່ແມ່ຜູ້ປົກຄອງຈຳນວນຫຼາຍບໍ່ມີຄວາມພ້ອມທີ່ຈະຊື້ໃຫ້ລູກຫຼານໃນໄລຍະເປີດການສຶກສາໄດ້. ດັ່ງເຈົ້າໜ້າທີ່ກະຊວງສຶກສາທິການແລະກິລາກ່າວວ່າ.

“ແມ່ນອີ່ຫຼີປີກ່ອນຫັ້ນຊຸດໜຶ່ງ 89,000 ມາໄລ່ຊຸດໜຶ່ງ 90,000 ມີ 5 ຫົວເນາະ, ກໍ່ຕົກໃສ່ຫົວໜຶ່ງ 20 ກ່ວາພັນອັນລາຄາປື້ມແບບຮຽນນີ້ມັນຈະໄລ່ຕາມຄວາມໜາຂອງປື້ມເນາະ, ລາຄາແຕ່ລະຫົວຈະບໍ່ສໍ່າກັນອີກໃດ. ຄັນສົມມຸດວ່າແຍກຂາຍແຕ່ລະຫົວນີ້ກໍ່ຈະບໍ່ຄືກັນ, ຄືຈະມີບ່ອນດຽວທີ່ຂະເຈົ້າອະນຸຍາດໃຫ້ພີມຄືເປັນຂອງກະຊວງສຶກສາເພາະວ່າຫຼັກສູດມາຈາກຫັ້ນ, ປື້ມໂຮງພີມແຫ່ງອື່ນໃນປະເທດລາວບໍ່ສາມາດພີມໄດ້ເພາະວ່າບໍ່ແມ່ນຂອງລັດ”

ກ່ຽວກັບເລື່ອງນີ້, ເມື່ອທຽບໃສ່ລາຄາປື້ມແບບຮຽນໃນປີ 2020 ແລະ 2024 ເປັນຕົ້ນແບບຮຽນປະຖົມ 1 ຈາກລາຄາ 77,000 ກີບ/ຊຸດ, ເພີ່ມມາເປັນ 175,000 ກີບ/ຊຸດ. ແບບຮຽນມັດທະຍົມ 1 ຈາກ 162,000 ກີບ/ຊຸດເພີ່ມເປັນ 335,000 ກີບ/ຊຸດ ແລະ ແບບຮຽນມັດທະຍົມ 7 ຈາກ 229,000 ກີບ/ຊຸດ ເພີ່ມເປັນ 448,000ກີບ/ຊຸດ. ອີງຕາມລາຄາປືຶ້ມຢູ່ຮ້ານຂາຍປື້ມແບບຮຽນໃນນະຄອນຫຼວງວຽງຈັນ.