ເພາະຄວາມຈົນ ຈຶ່ງຕ້ອງທົນ ແຕ່ງດອງ ແຕ່ນ້ອຍ

ໄຊຍາ
2021-11-26
Share
ເພາະຄວາມຈົນ ຈຶ່ງຕ້ອງທົນ ແຕ່ງດອງ ແຕ່ນ້ອຍ ເດັກນ້ອຍ ຂາດສານອາຫານ, ວັນທີ 30 ມີນາ 2011.
RFA

ອົງ​ການ Save The Children ຣະ​ບຸ​ວ່າ ​ກຸ່ມ​ເຍົາ​ວະ​ຊົນ​ລາວ ​ອາ​ຍຸ​ຕ່ຳ​ກວ່າ 20 ປີ ຍັງ​ແຕ່ງດອງ ​ແຕ່​ອາ​ຍຸ​ຍັງ​ນ້ອຍ​ ຈຳ​ນວນ​ຫຼາຍ ​ແລະ​ສູງ​ທີ່​ສຸດ​ໃນ​ເອ​ເຊັຽ ​ຕາ​ເວັນ​ອອກ​ສຽງ​ໃຕ້​ຄິດ​ເປັນ 20% ໂດຍ​ປະ​ມານ​ໃນ​ທົ່​ວ​ປະ​ເທດ​ລາວ ຊຶ່ງ​ປະ​ກົດ​ການ ​ດັ່ງ​ກ່າວ​ຖື​ວາ​ເປັນ ​ວັງ​ວົນ​ຂອງ​ບັນ​ຫາ​ສັງ​ຄົມ ​ທັງ​ໃນ​ປັ​ຈ​ຈຸ​ບັນ ​ແລະ​ອາ​ນາ​ຄົດ.

ຢູ່​ແຂວງ​ຫຼວງ​ພ​ຣະ​ບາງ ​ຍັງ​ປະ​ກົດ​ມີ​ເຍົາ​ວະ​ຊົນ ​ອາ​ຍຸ 11-13 ປີ ພາ​ກັນ​ແຕ່ງດອງ ​ແຕ່​ຍັງ​ນ້ອຍ​ ໂດຍ​ສະ​ເພາະ ​ກຸ່ມ​ຊົນ​ເຜົ່າ​ມົ້ງ ​ແລະ​ຂະ​ມຸ ຈຶ່ງ​ເຮັດ​ໃຫ້​ເດັກ​ແມ່ຍິງ ​ແລະ​ເດັກ​ຜູ້ຊາຍ​ຊັ້ນ​ ມ.1-​ມ.3 ມີ​ອັດ​ຕ​ຣາ​ການ​ອອກ​ໂຮງ​ຮຽນ​ສູງ​ອີກ ​ທັງ​ເດັກ​ຍິງ​ທີ່​ອອກ​ມາ​ສ້າງ​ຄອບ​ຄົວ ​ນັ້ນ​ກໍ​ຈະ​ປະ​ເຊີນ​ກັບ​ການ​ ຖື​ພາ​ແຕ່​ຍັງ​ນ້ອຍ​ເຮັດ​ໃຫ້​ມີ​ຄວາມ​ສ່ຽງ ​ເປັນ​ແມ່​ສ່ຽງ​ພັຍ ​ເນື່ອງ​ຈາກ​ຮ່າງ​ກາຍ ​ໃນ​ໄລ​ຍະ​ອາ​ຍຸ​ດັ່ງ​ກ່າວ​ ຍັງ​ບໍ່​ເໝາະ​ສົມ​ກັບ​ການ​ຖື​ພາ ​ຊຶ່ງ​ສາ​ເຫດ​ທີ່​ເຮັດ​ໃຫ້​ເດັກແມ່​ຍິງ​ແຕ່ງດອງ ​ແຕ່​ຍັງ​ນ້ອຍ​ກໍຍ້ອນ​ຄວາມ​ທຸກ​ຍາກ ​ເປັນ​ສາ​ເຫດ​ຕົ້ນ​ຕໍ. ດັ່ງ​ເຈົ້າ​ໜ້າ​ທີ່ ​ຜ​ແນກ​ສາ​ທາ​ຣະ​ນະ​ສຸກ ​ແຂວງ​ຫຼວງ​ພ​ຣະ​ບາງ ​ກ່າວ​ຕໍ່​ວິ​ທ​ຍຸ​ເອ​ເຊັຽ​ເສ​ຣີ​ ໃນ​ວັນ​ທີ 26 ພຶສ​ຈິ​ກາ​ນີ້​ວ່າ:

ອານາຄົດບາງເທື່ອຮຽນກໍບໍ່ໄດ້ມີວິຊາອາຊີບ ບໍ່ໄດ້ຊອກວິຊາອາຊີບ ເກີດເປັນແນວນັ້ນກໍປະລະໂຮງຮຽນນັ້ນເອົາຜົວເອົາເມັຍນ່າແນ່ນອນມັນ 11-12 ປີກໍແມ່ນແມ່ສ່ຽງພັຍເນາະ ສ່ວນຫຼາຍອັນທີນຶ່ງມັນເກີດກ່ອ ກຳນົດສ່ວນຫຼາຍມັນລຸ ບາງເທື່ອເວລາພາກ ສ່ວນທີ່ວ່າມັນຄົບກຳນົດເວລາ ເກີດມັນກໍເກີດຍາກສ່ວນຫຼາຍກໍແມ່ນ ອາການເລືອດໄຫຼຫຼາຍ ສອງມາພໍ່ແມ່ກໍຫຍຸ້ງຍາກ ການສົ່ງເສີມເຣື່ອງ ທືນການສຶກສາ.”

ຍາ​ນາງ​ໄດ້​ກ່າວ​ຕື່ມ​ວ່າ ​ແມ່​ຍິງ​ລາວ​ແຕ່ດອງ ​ແຕ່​ຍັງ​ນ້ອຍ​ຍັງ​ນຳ​ພາ​ ໄປ​ເຖິງ​ຜົ​ລ​ກະ​ທົບ​ຂອງ​ການ​ ໃຊ້​ຄວາມ​ຮຸນ​ແຮງ ​ທາງ​ດ້ານ​ຮ່າງ​ກາຍ ​ຕໍ່​ເດັກ​ນ້ອຍ​ນຳ​ອີກ​ ເປັນ​ຕົ້ນ​ລະ​ຫວ່າງ​ທີ່​ເດັກແມ່​ຍິງ​ຖື​ພາ​ ມີ​ຄວາມ​ຈຳ​ເປັນ​ຕ້ອງ​ໄປ​ອອກ​ແຮງ​ງານ ​ເຮັດ​ໄຮ່ ເຮັດ​ນາ ຕາກ​ແດດ ຕາກ​ລົມ ຕາກ​ຝົນ ຕາມ​ຄຳ​ສັ່ງ​ຂອງ​ຜົວ ຊຶ່ງ​ຄວາມ​ຮຸນ​ແຮງ​ດັ່ງ​ກ່າວ ​ເດັກ​ແມ່ຍິງ​ຈະ​ຖື​ວ່າ ບໍ່​ແມ່ນ​ຄວາມ​ຮຸນ​ແຮງ ​ຍ້ອນເດັກແມ່​ຍິງ ​ເຮັດ​ດ້ວຍ​ຄວາ​ມ​ສະ​ມັກ​ໃຈ​ ບໍ່​ແມ່ນ​ຖືກ​ບັງ​ຄັບ ​ເພື່ອ​ໃຫ້​ຄອບ​ຄົວ​ໄດ້​ມີ​ຢູ່​ມີ​ກິນ.

ພ້ອມ​ດຽວ​ກັນ​ນີ້​ເດັກແມ່​ຍິງ ​ທີ່​ອາ​ຍຸ​ຍັງ​ນ້ອຍ ​ແລ້ວ​ແຕ່ງດອງ​ນັ້ນ​ຍັງ ​ປະ​ເຊີນ​ກັບ​ການ​ຖື​ພາ​ຕິດ​ຕໍ່​ກັນ ​ປີ​ຕໍ່​ປີບໍ່​ໄດ້​ເວັ້ນ ໄລ​ຍະ​ເວ​ລາ​ການ​ ມີ​ລູກ​ຫ່າງ ບໍ່​ມີ​ການ​ຄຸມ​ກຳ​ເນີດ​ ຕາມ​ທີ່​ເຈົ້າ​ໜ້າ​ທີ່​ແນະ​ນຳ​ໄປ ​ຍ້ອນ​ເດັກແມ່​ຍິງ​ຈະ​ເຊື່ອ​ຄຳ​ເວົ້າ ​ຂອງ​ຜົວ​​ຢ່າງ​ດຽວ. ຂ​ະນະ​ທີ່​ຜົວ ​ກໍ​ຖື​ເບົາ​ເຣື່ອງ​ສຸ​ຂ​ພາບ ​ຂອງ​ເມັຍ​ຈຶ່ງ​ເຮັດ​ໃຫ້ ​ສຸ​ຂ​ພາບ​ຂອງ​ເດັກແມ່​ຍິງ​ຈຳ​ນວນ​ນັ້ນ ​ຕົກ​ຢູ່​ໃນ​ຄວາມ​ສ່ຽງ​ ທີ່​ຈະ​ເສັຽ​ຊີ​ວິດ​ ທັງ​ແມ່​ແລະ​ລູກ, ດັ່ງ​ຍາ​ນາງ​ໄດ້​ກ່າວ​ຕື່​ມ​ວ່າ:

ຊົນເຜົ່າ ຜູ້ຊາຍ ຍົກໂຕຢ່າງເນາະ ຖືພາ 6 ເດືອນ, 7 ເດືອນ, 8​ ເດືອນ ກໍຍັງໃຫ້ໄປຫັ້ນນ່າໄປໄຮ່ໄປສວນຖືໄປເອົາຟືນເສັຽຊີວິດຍ້ອນເອົາຟືນເນາະແມ່ນລົ້ມທັ່ງແລ້ວບາດນີ້ລູກຫັ້ນລຸເລືອດໄຫຼແລ້ວເອົາບໍ່ທັນໄປໄຮ່ໄປສວນຍ່າງເປັນ 2-3 ຊົ່ວໂມງຈັ່ງຮອດບ້ານຈາກບ້ານມາຮອດໂຮງໝໍເປັນຊົ່ວໂມງສອງຊົ່ວໂມງຂີ່ຣົດທາງດິນແດງມາບໍ່ທັນຕາຍ.”

ປັ​ຈ​ຈຸ​ບັນ​ ແຂວງ​ຫົວ​ພັນ​ ມີ​ເດັກ​ແມ່ຍິງ​ ອາ​ຍຸ​ຕ່ຳ​ກວ່າ 15 ປີ ແຕ່ງດອງ​ແຕ່​ຍັງ​ນ້ອຍ ​ຢ່າງກວ້າງ​ຂວາງ​ໃນ​ກຸ່ມ​ຊົນ​ເຜົ່າ​ມົ້ງ ​ທີ່​ຄອບ​ຄົວ​ມີ​ຖາ​ນະ​ທຸກ​ຍາກ ​ຊຶ່ງ​ການ​ແຕ່ດອງ​ແຕ່​ຍັງ​ນ້ອຍ​ ຂອງ​ເດັກແມ່​ຍິງ ​ຊົນ​ເຜົ່າ​ນັ້ນ​ເຮັດ​ໃຫ້ ​ທັງ​ໂຕ​ເດັກ​ຍິງ​ ແລະ​ລູກ​ຈຳ​ນວນ​ນຶ່ງ ​ມີ​ພາ​ວະ​ຂາດ​ສານ​ອາ​ຫານ​ ທັງ​ຂ​ະນະ​ຖື​ພາ ​ແລະ​ຫຼັງ​ເກີດ​ລູກ. ເນື່ອງ​ຈາກ ​ເຂົາ​ເຈົ້າ​ເປັນ​ຄອບ​ຄົວ​ທຸກ​ຍາກ, ການ​ກິນ​ກໍ​ຈະ​ບໍ່​ຄົບ​ໝ​ວດ​ໝູ່​ປານ​ໃດ, ຫາກ​ພາກ​ສ່ວນ​ທີ່​ກ່ຽວ​ຂ້ອງ ​ຍັງ​ບໍ່​ແກ້​ໄຂ​ບັນ​ຫາ​ ຄວາມ​ທຸກ​ຍາກ​ໃນ​ເຂດ​ຫ່າງ​ໄກ ​ຢ່າງ​ຈິງ​ຈັງ ​ກໍ​ຈະ​ເຮັດ​ໃຫ້​ເຍົາ​ວະ​ຊົນ ​ລາວ​ກຸ່ມ​ນີ້​ ປະ​ເຊີນ​ກັບ​ຜົ​ລ​ກະ​ທົບ ​ຫຼາຍກວ່າ​ໝູ່​ ທັງ​ໃນ​ຖາ​ນະ​ຄວາມ​ເປັນ​ແມ່​ ທີ່​ສ່ຽງ​ພັຍ, ຖາ​ນະ​ເມັຍ​ທີ່​ຕ້ອງ​ເຮັດ​ຕາມ​ໃຈ​ຜົວ ​ແລະ​ຖາ​ນະ​ລູກ​ທີ່​ຕ້ອງ​ແຕ່ງດອງ​ແຕ່​ຍັງ​ນ້ອຍ ​ຕາມ​ຮີດ​ຄອງ​ປະ​ເພ​ນີ ​ທີ່​ພໍ່-ແມ່ ໄດ້​ມີ​ມາ​ຕັ້ງ​ແຕ່​ເດີມ. ດັ່ງ​ເຈົ້າ​ໜ້າ​ທີ່ ຜ​ແນກ ສາ​ທາ​ຣະ​ນະ​ສຸກ ​ແຂວງ​ຫົວ​ພັນ​ກ່າວ​ວ່າ:

ກໍຊິແມ່ນອາຫານຫຼັກໆ ເລີຍເນາະເພາະວ່າ ຢູ່ເບື້ອງຂັ້ນພື້ນຖານເຂົາເຈົ້າແນ່ເຂົາຫາກີນໄດ້ສ່ຳໃດເຂົາກໍກີນສ່ຳນັ້ນມີສ່ຳໃດເຂົາກໍກີນສ່ຳນັ້ນເຮັດໃຫ້ຂາດເລືອດໂຕຊີດ ຊ່ວງຖືພາຫັ້ນນ່າມີຄວາມຊີດເຫຼືອງເຂົາມາຝາກທ້ອງເນາະແລະກໍການເຕີບໃຫຍ່ຂອງລູກເຂົາທາງເຂົາພ້ອມຫັ້ນນ່າ.”

ນອກ​ເໜືອ​ຈາກ ​ຜົ​ລ​ກະ​ທົບ​ດັ່​ງກ່າວ ​ທີ່​ເດັກແມ່​ຍິງ​ແຕ່ງດອງ​ແຕ່​ຍັງ​ນ້ອຍ ​ປະ​ເຊີນ​ຂ້າງ​ຕົ້ນ​ນັ້ນ, ເດັກແມ່​ຍິງ​ແລະ​ເດັກຜູ້​ຊາຍ​ຊົນ​ເຜົ່າ​ມົ້ງ​ ແລະ​ຊົນ​ເຜົ່າ​ຂະ​ມຸ ​ຢູ່​ເມືອງ​ນາ​ໝໍ້ ແຂວງ​ອຸ​ດົມ​ໄຊ ທີ່​ຕັດ​ສິນ​ໃຈ ​ສ້າງ​ຄອບ​ຄົວ​ນຳ​ກັນ​ແຕ່​ຍັງ​ນ້ອຍ ​ຍັງ​ເຮັດ​ໃຫ້​ມີ​ການ​ຜິດ​ຖຽງ​ກັນ​ຫຼາຍ ​ແຕ່​ຍັງ​ບໍ່​ເຖິງ​ຂັ້ນ​ປະ​ກັນ ຊຶ່ງ​ສາ​ເຫດ​ທີ່​ເຮັດ​​ໃຫ້​ເຂົາ​ເຈົ້າ​ປະ​ຮ້າງ ​ກັນ​ກໍ​ຍ້ອນ​ວ່າ​ເສ​ຖ​ກິ​ຈ ​ຄອບ​ຄົວ​ບໍ່​ສາ​ມາດ ​ກຸ້ມ​ຢູ່​ກຸ້ມ​ກິນ​ໄດ້ ​ຫຼື​ບາງ​ຄູ່​ຜົວ-ເມັຍ ​ແມ່ນ​ຝ່າຍ​ໃດ​ຝ່າຍ​ນຶ່ງ​ຫັ້ນ ​ສູ່​ການ​ເສບ​ຢາ​ເສບ​ຕິດ ​ກໍ​ເຮັດ​ໃຫ້​ຕ້ອງ​ປະ​ຮ້າງ​ກັນ ​ໃນ​ທີ່​ສຸດ. ດັ່ງ​ເຈົ້າ​ໜ້າ​ທີ່ ​ຫ້ອງ​ການ​ສາ​ທາ​ຣະ​ນະ​ສຸກ ​ເມືອງ​ນາ​ໝໍ້​ກ່າວ​ວ່າ:

ສ່ວນຫຼາຍກໍແມ່ນຜິດຖຽງກັນຜິດຖຽງກໍບໍ່ເຖີງຂັ້ນປະຂັ້ນຮ້າງເດັກນ້ອຍ ກໍຍັງບໍ່ຮູ້ຫຍັງເທື່ອເນາະບາງເທື່ອກໍຫາຊອກເງິນອີ່ຫຍັງຈັ່ງຊິມັນກໍເຂົາວັຍກຳລັງຫຼີ້ນ ກຳລັງກີນສະນັ້ນກໍຫາກມີສ່ວນນ້ອຍ.”

ຢ່າງ​ໃດ​ກໍ​ຕາມ ​ພາກ​ຣັ​ຖ​ຄວນ​ມີ​ແຜນ​ການ ​ແກ້​ໄຂ​ບັນ​ຫາ​ການ​ແຕ່ງດອງ​ແຕ່​ຍັງ​ນ້ອຍ ​ດ້ວຍ​ການ​ສ້າງ​ຫຼັກ​ສູດ​ການ​ຮຽນ-ການ​ສອນ ​ກ່ຽວ​ກັບ​ຜົ​ລ​ກະ​ທົບ​ ຂອງ​ການ​ແຕ່ງດອງ​ແຕ່​ຍັງ​ນ້ອຍ ເຂົ້າ​ໄປ​ສິດ​ສອນ​ເຍົ​າ​ວະ​ຊົນ​ລາວ ​ຕັ້ງ​ແຕ່​ຣະ​ດັບ​ຊັ້ນ​ປະ​ຖົມ​ສຶ​ກ​ສາ ​ເຖິງ​ຣະ​ດັບ​ມັ​ທ​ຍົມ​ສຶ​ກ​ສາ​ອີກ ທັງ​ຫຼັກ​ສູດ​ດັ່ງ​ກ່າວ​ຈະ​ຕ້ອງ​ເປັນ ​ຫຼັກ​ສູດ​ທີ່​ສາ​ມາດ​ສືບ​ຕໍ່​ການ​ຮຽນ-ການ​ສອນ​ໄດ້​ ເປັນ​ເວ​ລາ​ດົນ ບໍ່​ແມ່ນ 1-2 ປີ ​ເພື່ອ​ໃຫ້​ນັກ​ຮຽນ ​ໃນ​ແຕ່​ລະ​ລຸ້ນ​ທີ່​ເຂົ້າ​ມາ​ຮຽນ​ ໃນ​ແ​ຕ່​ລະ​ສົກ​ຮຽນ​ ໄດ້​ຮັບ​ຄວາມ​ຮູ້​ເປັນ​ຈຳ​ນວນ​ເພີ່ມ​ຂື້ນ ​ທຸກ​ປີບໍ່​ແມ່ນ​ແຕ່​ປີ​ສອງ​ປີ​ ເທົ່າ​ນັ້ນ. ​ດັ່ງ​ເຈົ້າ​ໜ້າ​ທີ່​ ພາກ​ປະ​ຊາ​ສັງ​ຄົມ ​ທີ່​ເຮັດ​ວຽກ​ສົ່ງ​ເສີມ​ສຸ​ຂ​ພາບ ​ແມ່​ຍິງ​ແລະ​ເດັກ​ກ່າວ​ວ່າ:

ໃຫ້ມີການສຶກສາເພີ່ມຂື້ນນີ້ແຫຼະກ່ຽວກັບວຽກງານ ສົ່ງເສີມແມ່ຍິງແລະເດັກນ້ອຍໂດຍສະເພາະໃຫ້ມີຫຼັກສູດການສຶກສາເນາະສຳລັບທາງພາກຣັຖບໍ່ທີ່ຊຸກຍູ່້ ໂດຍສະເພາະ ຫຼືວ່າເປັນກົດໝາຽຫຼືວ່າເປັນໂຄງການທີ່ໄປຊຸກຍູ້ຊຸມຊົນ​​ສອກຫຼີກຫັ້ນເນາະ.”

ນອກ​ຈາກ​ນີ້ ​ຫາກ​ມີ​ໂຄງ​ການ​ຊ່ອຍ​ເຫຼືອ​ຄ​ຣູ ​ທ້ອງ​ຖີ່ນ ​ຫຼື​ຄ​ຣູ​ອາ​ສາ​ມີ​ເງິນ​ເດືອນ ​ໄວ້​ຊື້​ຢູ່​ຊື້​ກີນ​ ກໍ​ຈະ​ແຮງ​ດີ​ຫຼາຍ​ ເນື່ອງ​ຈາກ​ເບິ່ງ​ຕາມ​ສະ​ພາບ​ໂຕ​ຈິງ​ແລ້ວ ​ຢູ່​ໂຮງ​ຮຽນ​ໃນ​ເຂດ​ຫ່າງ​ໄກ ​ສອກ​ຫຼີກ​ຈະ​ມີ​ຄ​ຣູ​ອາ​ສາ ​ສອນ​ໜັງ​ສື​ນັກ​ຮຽນ ​ແຕ່​ການ​ສອນ​ຂອງ​ຄ​ຣູອ​າ​ສາ ​ກໍ​ບໍ່​ໄດ້​ເຕັມ​ເມັດ​ເຕັມ​ໜ່ວຍ ເນື່ອງ​ຈາກບໍ່​ມີ​ເງິນ​ເດືອນ ​ຕ້ອງ​ໄດ້​ເອົາ​ເວ​ລາ​ພັກ ​ຫຼື​ເວ​ລາ​ສອນ​ໄປ​ເຮັດ​ວຽກ ​ເສີມ​ກໍ​ເຮັດ​ໃຫ້​ນັກ​ຮຽນ​ຊັ້ນ​ປະ​ຖົມ​ ແລະ​ມັ​ທ​ຍົມ​ໃນ​ເຂດ​ຫ່າງ​ໄກ ​ບໍ່​ໄດ້​ເຂົ້າ​ເຖິງ​ຄວາມ​ຮູ້​ ດ້ານ​ສຸ​ຂ​ສຶກ​ສາ ບໍ່​ວ່າ​ຈະ​ເປັນ​ການ​ຄຸມ​ກຳ​ເນີດ ​ຫຼື​ການ​ຖື​ພາ​ແຕ່​ຍັງ​ນ້ອຍ ​ທີ່​ເປັນ​ຄວາມ​ຮູ້​ສຳ​ຄັນ ​ທີ່​ຈະ​ເຮັດ​ໃຫ້​ເດັກ​ຍິງ​ ແລະ​ເດັກ​ຊາຍ​ ປະ​ກອບ​ການ​ຕັດ​ສິນ ​ໃນ​ການ​ອອກ​ຮຽນ ​ແລະ​ແຕ່ງດອງ​ແຕ່​ຍັງ​ນ້ອຍ. ອີງ​ຕາມ​ຄວາມ​ເວົ້າ​ຂອງ​ເຈົ້າ​ໜ້າ​ທີ່​ພາກ​ປະ​ຊາ​ສັງ​ຄົມ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ